Sobre nós

QUEN SOMOS?

Os Comités é a nova organización do estudantado galego que nace co obxectivo de impulsar e imprimirlle un novo ritmo ao movemento estudantil galego, recollendo e asumindo a herdanza ideolóxica e práctica das organizacións estudantís nacionalistas (ERGA, CAF, CAE) e dando unha resposta conxunta e coordinada de todo o estudantado aos ataques que sofre o ensino do noso país.

A nosa organización, da mesma maneira que os CAF e os CAE, organízase en comités de centro (un por cada instituto, escola ou facultade). Estes comités son ABERTOS, é dicir, nos que pode participar quen quixer. As nosas decisións tomámolas de xeito colectivo en asembleas onde ti tamén tes voz.

Estamos presentes en toda Galiza nos sete campus e nas tres universidades galegas e en grande parte dos institutos do país.

A nosa acción lévase a cabo a través de campañas e mobilizacións coas que denunciamos os moitos problemas que afectan ao sistema educativo, producidos por unha política educativa que non favorece o ensino público galego e que ignora a voz das e dos estudantes. Este traballo compleméntase co traballo institucional a través dos órganos de goberno de ensino medio e das universidades galegas onde somos maioritarios (Consellos Escolares, Consellos de Goberno, Claustros, Xuntas de Facultade e Consellos de Departamento).

QUE QUEREMOS?

Os Comités recollemos a herdanza política-ideolóxica das organizacións estudantís nacionalistas que nos precederon plasmada no obxetivo político dun ensino:

GALEGO: planificado desde Galiza e en función dos intereses do pobo galego. Inserido na realidade social e cultural galega, e polo tanto cuns contidos orientados cara a transformación da nosa realidade socioeconómica e a potenciación da cultura nacional galega. Consideramos de vital importancia a inversión do proceso de desgaleguización do ensino, reivindicamos a adaptación dos currículos e da investigación ao noso país, reclamamos a existencia de estudos especificamente relacionados coa nosa realidade e co desenvolvemento socioeconómico da Galiza, defenderemos a estrita regulamentación do uso do galego para lograrmos a súa plena normalización.

PÚBLICO: financiado publicamente e suxeito a criterios que favorezan as maiorías sociais e as clases populares, garantindo o acceso ao ensino en igualdade de condicións para todas as e os estudantes.

DEMOCRÁTICO: planificado en función dos intereses das maiorías sociais e con órganos de goberno verdadeiramente democráticos nos que a presenza do estudantado teña unha incidencia real na toma de decisións.

DE CALIDADE: interdisciplinar e non memorístico que incorpore os avances da ciencia e da cultura, un ensino crítico e científico que permita coñecer os distintos enfoques metodolóxicos e que permita a autoformación das e dos estudantes.

Se queres saber máis sobre as orixes da nosa organización, preme aquí.